O Programa IACOBUS
ten como misión impulsar a cooperación e contribuír á consolidación do
ecosistema de coñecemento e innovación da Eurorrexión Galicia–Norte de
Portugal.
É unha iniciativa
estratéxica de cooperación académica, científica e tecnolóxica, creada e
xestionada pola AECT da Eurorrexión Galicia–Norte de Portugal (GNP, AECT), para
fomentar a colaboración, o intercambio de coñecemento e a innovación entre
universidades, institucións de educación superior e centros tecnolóxicos de
ambos os territorios.
Desde a súa creación, o
programa consolidouse como unha ferramenta pioneira en Europa que permitiu
fortalecer a colaboración transfronteiriza, impulsar a excelencia na
investigación e xerar redes de cooperación estables entre os axentes do
ecosistema científico e tecnolóxico de Galicia e o Norte de Portugal. Ademais,
contribuíu ao avance da I+D+i mediante o desenvolvemento de iniciativas
conxuntas, favorecendo á súa vez o intercambio cultural e a xeración de
oportunidades de desenvolvemento profesional na eurorrexión.
O Programa IACOBUS está
aliñado coas prioridades establecidas no Plan de Investimentos Conxuntos da
Eurorrexión Galicia–Norte de Portugal (PIC) e coas directrices definidas pola
Estratexia de Especialización Intelixente Transfronteiriza Galicia–Norte de Portugal
(RIS3-T), dous documentos estratéxicos para a Comunidade de Traballo
Galicia–Norte de Portugal, e orientados ao fortalecemento da cooperación, a
innovación e o desenvolvemento sostible do espazo eurorrexional.
O programa estrutúrase en
tres modalidades —IACOBUS Estadías de Investigación, IACOBUS
Publicacións Científicas (Papers) e IACOBUS Patentes— coa finalidade
de promover a mobilidade investigadora, a difusión científica e a transferencia
de coñecemento e innovación, reforzando así o impacto da actividade
investigadora.
O IACOBUS Journal
é outra das iniciativas do programa, creada co propósito de se afirmar como
unha revista científica e plataforma editorial para a difusión do coñecemento e
da innovación, que aspira a consolidarse como un referente científico
transfronteirizo e internacional.
O Programa IACOBUS conta co
apoio da Unión Europea a través da cofinanciación do Programa INTERREG
España–Portugal (POCTEP).
